Léif Enseignanten, léif Elteren, léif Schüler,
De Coronavirus huet eist ëffentlecht Liewen op d'Kopp gehäit an de leschte Wochen. Nodeems d'Mesurë vun der Regierung erlaabt hunn, d'Verbreede vum Virus ze bremsen, ginn d'Schoulen an deenen nächste Woche successiv nees opgemaach. Dat bedeit net, dass mer kënne weidermaache wéi virum 13. Mäerz a bis den Ufank vun der grousser Vakanz wäerte mer och keng Normalitéit erreechen.
Mir hunn en Equiliber gesicht tëscht dem Schutz vun der Gesondheet vun den Enseignanten a Schüler engersäits an de fundamentale Missioune vun der Schoul anersäits, nämlech d’Zukunftschancë fir Kanner a Jonker ze garantéieren an dofir ze suergen, dass d’Schouljoer esou gutt et geet ofgeschloss ka ginn. Dofir fänke mer de 4. Mee mat de Premièresklassen un. Den 11. Mee maache mer d’Lycéeë fir déi aner Klassen op (7e – 2e) an de 25. Mee d’Grondschoulen an d’Betreiungsstrukturen.
Eng ganz Rei vu Moossname goufen ergraff, fir d'Sécherheet vun de Schüler an Enseignanten ze assuréieren a fir gläichzäiteg e qualitativ héichwäertegen Enseignement ze erlaben. D’Effektiver vun de Klasse ginn op d’Hallschent reduzéiert andeems den Enseignant dee selwechte Cours wärend zwou Woche virun zwou Gruppen hält. Déi Woch, wann d’Schüler net an der Schoul sinn, kréien se Verdéiwungsaufgaben, déi se an där Zäit maachen.
Schouldoheem.lu steet Iech natierlech och weider zur Verfügung mat Offeren a Rotschléi grad ewéi eis Helpline 8002 9090, déi bei schoulesche Froen hëlleft.
Ech soen all den Acteuren aus der Schoul Merci fir dee remarkabelen Asaz, deen si trotz schwieregen Ëmstänn geleescht hunn a weider leeschten.
Bescht Gréiss a virun allem eng gutt Gesondheet!
Claude Meisch
Minister fir Educatioun, Kanner a Jugend
