Fir den Engagement, d’Kreativitéit an d’Motivatioun vun de SchülerInnen (EF, ES) ze promouvéieren an z’ënnerstëtzen, lancéiert d’Equipe vum Internetsite eduart.lu de 4. Konschtchallenge Fréijoer, Summer, Sonneschäin, Liicht a Schiet a proposéiert dir dech weider vu klengen, onscheinbare Saache faszinéiere loossen.

Alles wat’s du dofir brauchs ass eng Handyskamera, Alldagsgéigestänn, e gutt Liicht a kreativ Iddien. Et gi bal keng Grenzen, denger Fantasie kanns du fräie Laf loossen. Sich der een oder méi Alldagsgéigestänn aus an inzeenéier se, andeems du spannend Schiet-/Liichteffekter mat denger Kamera festhäls. Des Effekter kriss de duerch haart Liicht (Sonneliicht, Blëtzliicht, Bürosluucht, Täscheluucht, Smartphoneluucht).

Stell eng Fotoserie zesummen, déi aus 3 ënnerschiddleche Fotografië besteet déi a Verbindung zouenee stinn:

Foto 1: Een oder méi Géigestänn mat spannende Schiet-/Liichteffekter.

Foto 2: Een Deel vun dir mat oder ouni den (déi) ausgesichte Géigestänn.

Foto 3: Du (däin Uewerkierper) mat engem vun den ausgesichte Géigestänn.

Hei puer Tipps fir d’Gestalten: Wéi eng Géigestänn werfen een interessante Schiet? Wéi kann ech d‘Opmierksamkeet op mäi Motiv riichten?

Benenn deng Biller: Däi Numm_Titel_Nummer (1, 2 an 3) a schéck se bis spéitstens den 18. Mee 2020 un eduart@men.lu.

En Dokument mam detailléierten Aarbechtsoptrag fënns du ënnen op der Säit.

eduart.lu

Den Internetsite eduart.lu ass di offiziell Plattform fir Konschtunterrecht zu Lëtzebuerg (ESC an ESG) a proposéiert dem Public, SchülerInnen a Léierpersonal, souwéi all anere Konschtintresséierten eng Vitrinn déi all méiglech Facettë vum Fach regroupéiert.